𝗦𝗔𝗡 𝗘𝗡𝗥𝗜𝗤𝗨𝗘, 𝗜𝗟𝗢𝗜𝗟𝗢 — Patay ang isa ka lalaki matapos nga ginaalegar nga gin-utas ang kaugalingon nga kabuhi sa ila puluy-an sa Brgy. Camiri, San Enrique, Iloilo.
Ang biktima ang naga-edad 54, single, kag empeyado sang isa ka kalamayan sa amo nga banwa.
Sa interview sang Bombo Radyo kay Police Lieutenant Vincent Garcia, Hepe sang San Enrique Municipal Police Station, iya ginpahayag nga may nabaton sila nga report nga may duha ka patay nga indibidwal sa nasambit nga barangay.
Apang sa ila nga pagpadulong, ang isa nga ginapahayag nga patay, ang isa lamang ka ido nga nakit-an nga nakaputos.
Suno kay Garcia, sa kapareho man nga lugar, ginpadulongan nila ang isa pa ka puluy-an kun sa diin nakumpirma nga may nakit-an nga lawas sang lalaki nga nagakaya sa iya nga sulod ka kwarto.
Ginpahayag man sini nga may higot nga nakit-an malapit sa biktima apang wala nakahigot sa iya nga liog, rason man nga ginalantaw sang otoridad ang posibilidad kun may natabo nga foul play.
Padayon pa nga ginaimbestigaran sang San Enrique Municipal Police Station ang natabo agud matumod ang kamatayon sang biktima sa nagluntad nga insidente.
