ILOILO — Patay ang isa ka lalaki matapos nga ginluthang sang iya nakaupod sa discohan sa Barangay Lawigan, San Joaquin, Iloilo.
Ang biktima amo si alyas Apa, residente sang Brgy. Languanan, San Joaquin, Iloilo; samtang ang suspek amo si alyas Cano, residente sang Brgy. Mabini Norte, San Joauqin, Iloilo.
Sa interview sang Bombo Radyo kay Police Captain Felix Perez, hepe sang San Joaquin Municipal Police Station, iya ginpahayag nga lunsay may impluwensya sang makahulubog nga ilimnon ang duha sang natabo ang insidente.
Suno kay Perez, naguwa ang duha sa discohan kag samtang nagalakat, may indi pag-intindihanay nga nagluntad nga nangin rason sang ila pagbaisay.
Gilayon naman nga nagkuha ang biktima sang iya dala nga kutsilyo kag gintuyo nga bun-on ang suspek, apang wala ini na-igo.
Insigida naman nga ginkuha sang suspek ang iya 22 revolver nga pusil kag wala nagduha-duha nga gintiro ang biktima, sa diin naigo ini sa dughan kag sa likod nga gintunaan sang iya kamatayon.
Santo sa imbestigasyon sang otoridad, dako ang posibilidad nga ang gintunaan sang indi pag-intindihanay amo ang pagpatay sang biktima sa pakaisa sang suspek sang 2022.
