𝗜𝗟𝗢𝗜𝗟𝗢 𝗖𝗜𝗧𝗬 — Nasapwan nga wala na sang kabuhi ang isa ka indibidwal sa iya nga kwarto subong nga gab-i sa Zone 1, Brgy. Jalandoni St., Brgy. Our Lady of Lourdes, Jaro Iloilo City.
Ang biktima amo si alyas “Victor”, ginapahayag nga isa ka nurse, kag tumandok sang Maasin, Iloilo.
Sa interview sang Bombo Radyo kay Punong Barangay Leo Lindero, iya ginpahayag nga nasapwan ang biktima nga nagakaya sa iya nga ibabaw sang katre sa sulod sang iya nga hulot sa ika-duha nga panalgan sang iya nga apartment.
Suno kay Lindero, isahanon ang biktima nga naga-arkila sa amo nga apartment sa sulod sang kapin 20 na ka tuig.
Ginpahayag man ni Lindero nga bangud indi ma-contact sang himata ang biktima, nagdesisyon ang iya pamilya nga magpadulong sa lugar agud sekyaron ini.
Santo naman sa inisyal nga impormasyon,myembro sang Lesbian, Gay, Bisexual, Transgender, and Queer + (LGBTQ) ang biktima.
Ginalantaw naman nga dako ang posibilidad nga may foul play nga natabo bangud makita sa lawas sang biktima nga may nilamposan sa ulo.
Padayon naman nga ginasekyar sang otoridad kun may Closed-circuit television ukon CCTV sa palibot sang lugar, agud matumod ang mga anggulo kun may naghungod gidman nga nagpatay sa biktima.
