Nagapanawagan sang bulig kag konsiderasyon sa Iloilo City Government ang isa ka manugbaligya halin sa Barangay Cubay, Jaro, Iloilo City matapos nga ginpahayag nga wala ini nabaton bilang bolantero bisan pa nakumpleto na niya ang tanan nga requirements sa pag-apply kuntani.
Sa interview sang Bombo Radyo kay Juan Grande, isa ka manugbaligya sang uga, nagalaum ini nga wala kuntani sang pinilian sang pagbaton sang mga aplikante sa syudad bilang mangin isa ka bolantero.
Nagahingyo ini kay Iloilo City Mayor Raisa Tre as amo man kay Maricel Mabaquiao, head sang Local Economic Enterprise Office, nga hatagan sang pagtamod ang iya sitwasyon kag makonsidera ang iya aplikasyon bangud gusto lang sini nga makakita sang pangabuhian.
Gindugang pa sini nga kuntani wala na lang ini ginpabudlayan sa pagproseso kun indi man lang pagbatunon, bangud suno sa iya mabudlay ang pag-proseso kag pag-abot sa Local Economic Enterprise Office, i-deny malang ang mga dokumento nga natapos na sini proseso.
Nagapangabay ini nga kuntani tagaan man ini sang tyansa nga biskan sa Mandurriao Market na lang kuntani ini mag-bolante agud indi na tuman nga malayuan sa iya nga pagbaligya sang iya produkto.
Gin-athag naman sang head sang Local Economic Enterprise Office (LEEO) nga may yara sang ginapatuman nga pagsulundan ang syudad angut sa pagbaligya sa gwa sang merkado.
Sa interview sang Bombo Radyo kay Maricel Mabaquiao, head sang LEEO, ginpahayag sini nga ang rason kun ngaa wala ginpasugtan si Juan Grande nga magbaligya sang uga bilang bolantero bangod ang mga bolantero sa gwa sang merkado ginatugutan lamang nga magbaligya sang utan kag prutas.
Ginpaathag ni Mabaquiao nga may yara sila sang ginasunod nga patakaran sa tanan nga merkado sa syudad, nga nagahatag limitasyon sang mga bolantero nga pwede magpwesto sa gwa.
Ginklaro man sini nga ang mga nagabaligya sang dried fish ukon uga may yara sang designated nga pwesto sa sulod sang merkado, kag indi ini dapat ginabaligya sa gwa sang merkado.
Dugang pa ni Mabaquiao, kun may makita nga wala nagasunod sa amo nga patakaran, ini ila ginasaway agud mapabilin nga organisado nga dalagan sang mga merkado.
