Nasapwan nga nagakabit sa puno sang acacia kag wala na sang kabuhi ang isa ka lalaki sa Barangay Mambiranan, Calinog, Iloilo.
Ang biktima amo si alyas “Francis”, 38-anyos, kag isa ka mekaniko.
Sa interview sang Bombo Radyo kay Police Major Miles Dieron, hepe sang Calinog Municipal Police Station, iya ginpahayag nga kagab-i pa sang ginapangita sang iya asawa ang biktima bangud wala na ini nakabalik matapos ginsugo sini nga mabakal sang suha.
Suno kay Dieron, antes naglakat ang biktima agud nga magbakal sang suha, nagpaninda pa sila kaupod ang iya nga asawa.
Ginsaysay man sini nga alas-7:00 kaina sang aga, sang nakabaton sang report ang ila talatapan nga may gin-abandona nga motorsiklo sa Mambiranan, Calinog.
Gintumod man sang natungdan nga matapos nagpadulong sila sa lugar, gilayon nga gindala ang motorsiklo sa kustodiya sang pulis kag ginpabilin ang pila ka mga kapulisan sa lugar.
Alas-10 kaina sang aga sang may nabaton liwat sila nga report nga may nasapwan nga nagabitay sa nasambit nga lugar.
Santo sa panaysayon sang nakasapo, nagapangita ni sang iya karbaw sang may natalupangdan sa puno sang acacia, apang ginkakibot niya sang may nasapwan ini nga nagakabit nga tawo gamit ang nylon nga higot.
Nagapasalig naman ang otoridad nga padayon ang pagpatuman sang imbestigasyon, kon sa diin, nakit-an sa closed circuit television ukon CCTV nga ulihi nakit-an ang biktima nga madasig ang pagpadalagan sang iya motorsiklo padulong sa katubohan sang nasambit nga barangay.
Ginalantaw naman sang otoridad nga wala sang foul play nga natabo.
Problema sa pangabuhi ilabi na sa pinansyal nga aspeto ang isa sa rason sang pag-utas sang biktima sang iya nga kaugalingon nga kabuhi.
