GUIMARAS – Nag-angkon sang pilas sa ulo ang isa ka lalaki matapos nabiktima sang hit and run sa Barangay Alaguisoc, Jordan, Guimaras.
Ang biktima ginkilala kay Terence Tamblador, 15 anyos nga menor de edad kag residente sang San Miguel, Jordan, Guimaras.
Suno sa kapulisan, papuli na kuntani nga nagasakay sa iya nga bisekleta ang 15 anyos sang ginbungguan ini sang motorsiklo.
Ginpahayag nga nakapalagyo sa gilayon ang suspek apang nawigit pa ang cellphone sini.
Gindala na sa Dr. Catalino Gallego Nava Provincial Hospital ang biktima samtang padayon sa pag-imbestiga ang mga kapulisan tuhoy sa suspek.
