ILOILO CITY–Isa ang patay samtang siyam naman ang nagkaladakpan sa engkwentro nga nagluntad sa tunga sang New Peoples Army (NPA) kag Philippine Army sa Sitio Butuan, Brgy. Igcabugao, Igbaras, Iloilo.
Sa exclusive interview sang Bombo Radyo kay Lt. Col. Sesinando Magbalot Jr., commander sang 61st Infantry Battalion, iya ginpahayag nga isa ka wala makilala nga bangkay ang ila nakita, isa ka gatos ka metros ang kalayuon gikan sa encounter site.
Suno kay Magbalot, ginapahayag nga katapo sang Suyak Platoon, Napoleon Tumagtang Command, Southern Front, KR-Panay ang napatay nga lalaki bangud sa ginasuksuk nga panapton nga may tatak nga BHB ukon Bagong Hukbong Bayan.
Magluwas diri, nakita man sa lugar ang backpack nga may unod nga bala kag Improvised Explosive Device (IED) kag tatlo ka galon sang gasolina.
Magluwas sa mga napatay, may nagkaladakpan man ang siyam ka tawo nga wala pa nakilala kag ginapatihan nga may kaangtanan man sa NPA samtang wala naman sang napilasan sa bahin sang hanay sang suldado.
Nahibalu-an nga indi magnubo sa 20 ka rebelde ang naka-away sang militar sa nasambit nga lugar kahapon nga adlaw.
Samtang, nagapati ang Philippine Army nga tuyo liwat sang New Peoples Army (NPA) nga magpangilkil sa Century Peak Energy Corporation sa Igbaras, Iloilo.
Sa exclusive interview sang Bombo Radyo kay Lt. Col. Sesinando Magbalot Jr., commander sang 61st Infantry Battalion, iya ginpahayag nga ang nakuha nga tatlo ka galon sa encounter site ang mahimo nga gamiton sang NPA agud nga halitan naman ang Century Peak Energy Corporation bangud sa pagpangilkil.
Ini bangud nga sang tinalikdan nga tinuig, ginsunog man sang sang NPA ang pila ka equipment kag gin-ambush man ang pila ka personnel sang nasambit nga kompaniya nga nagapatukod sang hydro powerplant.
Ginpahayag man ni Magbalot nga masami nga gina-atake sang NPA ang nasambit nga kompaniya bangud nga nagapakatig-a ini nga maghatag sang kwarta.