ILOILO CITY – Nagagwa sa imbestigasyon sang Balasan Municipal Police Station nga isa ka organized robbery group ang nagsulod sa isa ka mall sa Barangay Manhut sa amo nga banwa.
Sa interview sang Bombo Radyo kay Police Lieutenant Alexander Lauron, hepe sang Balasan Municipal Police Station, iya ginpahayag nga ang ini nga grupo ang gina-monitor man nga amo ang naga-operate sa probinsya sang Capiz.
May yara na sang ginakaptan nga pangalan ang kapulisan apang padayon pa nga gina-verify suno pa sa hepe.
Nahibaluan nga gindeklarar sang isa ka pawnshop nga nagdangat sa P5 million ang balor sang ginkawat nga alahas apang sang gin-isip liwat, nagdangat lamang sa P3 million.
Magluwas sa alahas, ginkuha man sang mga suspek ang mga cellphone nga nagabalor sang P292,000.
