Dako man ang kinalain sa iya kita sang wala pa ang pandemya, wala untat ang pagtahi sang isa ka amay sang mga pares sang sapatos agud nga makapiyan-piyan sa galastuhon sa sulod sang balay.
Sa interview sang Bombo Radyo kay Herminihildo Romero, 52, residente sang San Juan, Molo, Iloilo City kag isa ka balo, iya ginpahayag nga tuig 2005 sang nagsugod siya sa pagtahi sang mga sapatos kag tubtob subong, ini na ang iya nangin palangabuhian.
Suno kay Romero, isa na lang siya nga nagahimakas para sa iya mga anak matapos siya mabalo sa iya asawa sang 2013.
Sang sini naman nga tuig sang bulan sang Marso, nasapwan na lang ni Romero ang iya subang nga anak nga wala na sang kabuhi.
Apisar sini, nagapasalamat ang amay nga yara pa sa iya luyo ang isa ka anak nga lalaki kag isa ka apo.
Suno sa iya, sadto nga wala sang pandemya, bastante pa ang iya nga kita, apang sa subong, may mga kahigayunan nga halos wala gid siya sang bisan isa ka kustomer.
Apang para sa iya isa ka anak kag apo, wala sang pandemya nga makapugong sa iya paghimakas agud nga sila ang makakaon kag makabakal man sang kinahanglanon.
”Mensahe ko lang sa akon bata, amo lang na, maka-income ko, makabakal sang bugas, may kaunon naman kita.”
