ILOILO CITY–Ginapangita na sang otoridad ang isa sa ginakabig person of interest sa pagpatay sa isa ka manunudlo sa Brgy. Gimumua Agahon, Passi City.
Sa interview sang Bombo Radyo kay Brgy. Tanod Arnel Pagay sang  nasambit nga lugar, iya ginpahayag nga ginakabig nga suspek ang konduktor nga si June “Winwin” Aguilar, 34 anyos nga ila man lang kasimaryo.
Mismo ang konduktor nga si Aguilar ang nakapanugid sa driver nga si Marlon Pareño nga madamu siya sang kwarta.
Sang nabalahuba na ang natabo sa biktima nga si Ma. Corazon Tionson, 55 anyos, nangin dulaan na lang sa ila lugar si Aguilar.
Sang ginpadulungan sang pulis ang balay ni Aguilar, didto na nakita ang mga alahas nga ginapanag-iyahan sang biktima.
Nakita man ang mga bayo nga may tinulo sang dugo kag madamu nga kwarta nga nakasulod sa isa ka kahita.
Ginkilala naman sang labandera ni Tionson nga si Girly Siosan nga iya sang biktima ang mga nakita nga alahas.
Santo sa pagpangusisa, si Aguilar ang anay preso bangud sa kaso nga pagpatay.