ILOILO CITY – Ginhingyo ni International Criminal Court (ICC) Prosecutor Karim Khan sa ICC Pre-Trial Chamber nga pahanugutan ang iya opisina nga ibalik ang
imbestigasyon sa drug war sang Pilipinas apisar sang request sang pungsod nga ipaiway ini.
Sa 53 ka pahina nga request nga gin-upload sa website sang ICC, ginpahayag ni Khan nga ang Philippine government ang wala nagpakita nga gin-imbestigaran ukon gina-imbestigaran ang mga krimen nga yara sa jurisdiction sang ICC pagkatapos nga gin-analisar sang iya opisina ang deferral request sang Pilipinas.
Dugang pa ni Khan, ang imbestigasyon sang Philippine government ang tuman ka layo sa imbestigasyon nga patigayunon sang prosecution.
Ang imbestigasyon sang Pilipinas ang wala nagalakip sa mga krimen nga nakomiter antes ang July 2016 kun sa diin, nagsugod ang administrasyon ni presidente Rodrigo Duterte kag ginsuguran ang madugu-on nga war on drugs kag wala man nagasakop sang mga krimen magluwas sa murder nga may kahimuan sang pulis kaangay sang torture kag unlawful imprisonment.
Dugang pa ni Khan, ang impormasyon nga ginhatag sang Philippine government ang “insufficient” kag naga-refer gid lamang sa magamay nga porsyon sang mga pagpamatay sa tion sang drug war nga wala naglab-ot sa criminal prosecutions.
Ang Article 18(2) sang Rome Statute ang nagapahanugot sa isa ka state nga maghingyo sa ICC Prosecutor nga ipa-iway ang imbestigasyon sang criminal acts nga nagalakip sang mga krimen sa idalom sang jurisdiction sang ICC kaangay sang crimes against humanity.
Ginrekomendar ni Khna nga pahanugutan sang ICC Pre-Trial Chamber ang pagbalik sang imbestigasyon sang iya opisina sa sitwasyon sang Pilipinas kag pahanugutan ang mga biktima ukon ang ila mga respresentante nga mag-file sang written submissions sa request sang Pilipinas nga ipa-iway ang imbestigasyon sang ICC sa isa ka “reasonable but limited time.”
Ang ICC Pre-Trial Chamber sang September sang ngaligad nga tuig ang nagpahanugot sa ICC Prosecutor nga magpadayon sang imbestigasyon sang drug war sa Pilipinas humalin sang July 1, 2016 sang nagpungko si Duterte tubtob Marso 16, 2019 sang gin-withdraw ini sang ICC.
Ang imbestigasyon ang maga-cover man sang tyempo nga nangin alkalde si Duterte kag nangin bise alkalde sa Davao City humalin sang nangin kabahin sang ICC ang Pilipinas sang November 1, 2011.
