CALUYA, ANTIQUE – Padayon ang rescue operation sa isa ka pulis nga na missing matapos nagkapan ang isa ka motorbanca sa kalalawran nga sakop sang Sibolo Island kag Liwagao Island sa Caluya, Antique.
Sa interview sang Bombo Radyo kay Police Corporal Jairus Paloma, imbestigador sang Caluya Municipal Police Station, iya ginpahayag nga duha ka motorbanca ang gingamit para kun tani sa patigayunon nga relief operations sa Sibolo Island.
Suno kay Paloma, ang isa ka motorbanca nga ginkargahan sang relief goods kag ginasakyan sang mga tiglawas sang Local Government Unit sang Caluya ang nakadungka sa Sibolo Island samtang ang isa naman ka motorbanca nga ginasakyan sang tatlo ka pulis kag duha ka Philippine Coast Guard personnel ang nagkapan.
Ginpahayag ni Paloma nga maayo ang tiyempo sang naghalin sa Caluya ang duha ka motorbanca apang sang yara na sa tunga-tunga sang duha ka isla, hinali lang nga nagbaskog ang balod nga rason sang pagkapan sang motorbanca nga MB Habana.
Nakaluwas ang apat ka sakay apang missing sa gihapon ang isa ka pulis kag lakip sa recoveries amo ang pares sang sandal, bull cap kag duha ka Flat chairs sang nagkapan nga motorbanca.
