Ginbawian sang kabuhi ang isa ka pulis nga ginapahayag naglain ang pamatyag isa ka adlaw matapos nagpabakuna batok sa COVID-19.
Ang nasambit nga pulis ang na-assign sa Arevalo Police Station.
Sa interview sang Bombo Radyo kay Police Captain Chen Tañagras, hepe sang Arevalo Police Station, iya ginpahayag nga Hunyo 17 sang nagpaidalom ang pila nila ka police personnel sa COVID-19 vaccination.
Suno kay Tañagras, nalakip sa vaccination ang pulis nga nagtaliwan sa diin humalin sang Hunyo 18, wala na ini nakareport sa trabaho.
Ginapahayag nga may yara sang comorbidity ang amo nga pulis sa diin matapos ginbakunahan sa first dose sang COVID-19 vaccine, nag-file na ini sang sick leave kag nagapakig-angot na lamang sa pila niya ka kaupdanan agud indi mapabay-an ang pila niya ka trabaho.
Hunyo 25, ginbawian sang kabuhi ang pulis matapos gin-cardiac arrest sa diin gilayon nga ginpaidalom sa swab test ang bangkay sini.
Dugang ni Tañagras, Hunyo 26, nagwa nga nagpositibo sa COVID-19 ang nagtaliwan nga pulis.
Sa subong, ginpaidalom na sa cremation ang bangkay sang amo nga police personnel.
