ILOILO CITY — Patay ang isa ka pulis matapos nga nabungguan sini ang isa ka estudyante samtang nagatabok sa dalan sang Diversion Road, Iloilo City.
Ang estudyante amo si Mevin Señagan, 19-anyos, isa ka nursing student sang University of San Agustin, kag residente sang Brgy. Cabugao Sur, Sta. Barbara, Iloilo.
Ang pulis amo si Police Major Sullen Dominggo, 42-anyos, commission officer sang Iloilo Police Provincial Office (IPPO), kag residente sang Block 4, Brgy. Sinikway, Lapuz, Iloilo City Proper.
Sa interview sang Bombo Radyo kay Police Captain Melchor Tolentino, hepe sang Jaro Police Station, iya ginpahayag nga samtang nagatabok ang estudyante sa pedestrian lane, aksidente ini nga nabungguan sang motorsiklo nga ginamaneho sang pulis.
Suno kay Tolentino, pagbunggo sang pulis sa estudyante, nag-awas ini sa na-tuo nga bahin sa highway kag nabunggo sa poste sang street light kag nagtabog.
Ginpahayag man sang natungdan nga may suksok nga protection gear ang pulis, apang bangud sa tuman ka baskog nga impact sang pagtabog, nag-agum ini sang head injuries nga gintunaan sang iya kamatayon.
Santo sa imbestigasyon sang otoridad, naghalin sa area sang probinsya sang Iloilo ang pulis kag padulong kuntani sa syudad.
Nag-agum naman ang estudyante sang pilas sa agtang kag sa subong yara na sa Western Visayas Medical Center agud lapatan sang pagbulong.
Nahibaluan nga ang pulis ang anay nangin hepe sang San Miguel Municipal Police Station.
Ginsaysay naman sang saksi nga nahapit sang manobela sang motorsiklo nga ginamaneho sang pulis ang estudyante samtang nagatabok ini sa pedestrian lane, rason nga nagtabog gid ang pulis sa poste.
Sa interview sang Bombo Radyo kay Rodgie Barnizo, isa sa mga nakakita sang insidente, iya ginpahayag nga gilayon natumba ang estudyante sa dalan samtang ang motorsiklo ang nagdesretso padulong sa na-tuo nga bahin sang dalan.
Suno kay Barnizo, bangud sa mabaskog ang impact sang motor, tuman ka layo ang naapokan sini nga nagtuga gid sang matunog nga paglinugapok.
Ginpahayag man sang natungdan nga mahana pa lang man kuntani ang estudyante nga magtabok, apang, nalab-ot gid sang motorsiklo sang pulis.
