ILOILO CITY — Masubo nga ginsaysay sang isa ka residente sang Barangay Flores, Iloilo City Proper, ang ila kahimtangan matapos nga gin-demolish sang Task Force on Anti-Squatting and Illegal Structure Unit (ASISU) ang ila puluy-an kag balaligyaan.
Sa interview sang Bombo Radyo kay Emma Castillo, residente sang nasambit nga lugar, iya ginpahayag nga kaupod sini ang iya nga utod kag hinablos nga nagapuyo sa lugar sa sulod sang masobra duha na ka dekada.
Suno kay Castillo, wala naman sila sang mahimo bangud naguba na ang ila puluy-an kag aminado ini nga ginapanag-iyahan ang duta sang gobyerno.
Ginpahayag man ni Castillo nga ginahulat lang nila kuntani ang opisyal nga demolition order nga idagdag sang korte antes maghalin sa lugar.
Nahibaluan nga una na nga gin-appeal sa korte ang kaso sang mga naga-istar man sa lugar nga sanday Franny Joseph Salde Eje kag Vicente Diaz Llorico, apang tubtob subong, pending pa kag indi final and executory.
Nagahingyo naman si Castillo sa Iloilo City Government nga mahatagan sila sang masaylohan bangud nagakabalaka ini sa iya utod nga may nervous breakdown.
Gin-athag naman sang Iloilo City Anti-Squatting and Illegal Structure Unit (ASIS-U) nga humalin pa sang tuig 2017 nga nagpadala ang talatapan sang demand letter nga naga-abiso sa mga informal settlers nga maghalin na sa lugar.
Sa interview sang Bombo Radyo kay Love Joy Honsenilla, pinuno sang nasambit nga talatapan, iya ginpahayag nga ang pinakaulihi nga demand letter nga ginpadala sa mga pumuluyo sang Barangay Flores, Iloilo City Proper, amo sang Pebrero 20, 2024.
Nakasaad sa letter ang request nga kuhaon sang gobyerno ang mga ginapwestohan sang mga illegal settlers sa masulod sang pulo ka adlaw apang, nagpawala lang ang mga ini.
Nagpaathag man si Hosenilla nga ginaubra niya lang ang iya nga trabaho sa talatapan kag ginapatuman kun ano ang insakto sa layi.
