Nadakpan ang isa ka serial rapist kag ang iya upod matapos gin-abduct ang magkahagugma sa carpark sang SM City Iloilo sa Mandurriao, Iloilo City.
Sa panaysayon sang isa sa mga biktima nga si Mark Emil Jocson sang Brgy. Banuyao, Lapaz, Iloilo City, nagasakay na sila sa salakyan sang iya nobya nga si Queenie Lyn Hubahib sang Hibao-an, Mandurriao, Iloilo City, sang hinali lang sila nga gintayaan sila sang pusil sang isa sa tatlo ka mga suspetsado.
Ang isa sa mga suspetsado ang nagdala sang salakyan samtang ginabutangan naman sila sang isa ka suspetssado sang duct tape sa mata kag kamot.
Santo sa iya nga nabati-an, ginamolestiyahan sang mga suspetsado ang iya kahagugma sa diin naglab-ot pa sa tatlo ka milyon ka pesos ang ransom money nga ginpangayo sa ila.
Halin sa SM City Iloilo, nakalab-ot na sila sa bahin sang kinto distrito sa probinsya sang Iloilo sa diin naghapit pa ang mga suspetsado sa isa ka convinient store agud magbakal.
Diri na kag nakapalagyo si Queenie Lyn nga amo naman ang nagpangayo sang bulig sa Banate PNP samtang nabilin naman siya sa salakyan kaupod si Villareal nga amo ang nagdala sang salakyan.
Pagkatapos sadto, ginpadasig sang suspetsado ang pagpadalagan sang salakyan tubtub nga nakalab-ot sa Barotac Viejo sa diin sila naabutan sang mga pulis.
Gintumod naman ni Senior Police Officer 2 Bobby Gayagoy sang Barotac Viejo PNP, ang duha sa mga suspetsado nga nag-abduct sa duha ka mga biktima.
Suno kay SPO2 Gayagoy, ang duha sa tatlo ka mga suspetsado ang ginkilala nga sanday Sirius Gim Villareal sang Tigbauan, Iloilo kag Raymond Cordero sang Brgy. Amamaros, Pototan, Iloilo.
Si Villareal ang may yara sang pending nga kaso nga pagpanghimulos pila na katuig ang nakaligad.
Santo sa pag-usisa, nagpadulong diri sa syudad sang Iloilo ang mga suspetsado agud magpang-carnap.
Ginkumpirma ni Police Superintendent Ruby Gumban nga may yara sang ginpangatubang nga kaso nga rape ang isa sa mga suspetsado sa pag-abduct sa magkahagugma.
Suno kay PSupt. Gumabn, anay hepe sang Oton PNP kag subong hepe sang Passi City PNP, si Sirius Gim Villareal ang anay seafarer nga ginpasakaan sang kaso sang pagpanghimulos sa magkatuhay nga insidente.
Una amo ang iya nga paghimulos sa isa ka babayi sa distrito sang Arevalo samtang ang isa naman ang natabo sa Oton, Iloilo.
Modus sang suspetsado amo ang pagpasakay sa mga babayi sa iya salakyan kag diri na ginabuhat ang iya tuyo.
Nakapalagyo si Villareal sa ginpatigayon nga hot pursuit operation sa ila mismo balay sa Tigbauan, Iloilo.
Suno kay Police Chief Inspector Charlie Charlie Sustento, hepe sang Ajuy PNP kag team leader sang Municipal Station Tracker Team, narecover sa salakyan sang biktima ang isa ka bala sang .45 caliber pistol, isa ka 12 guage shotgun, pila ka personal nga gamit sang duha ka mga biktima kag mga suspetsado kag condom nga ginbakal pa sang suspetsado nga si Villareal.