Gin-ako sang isa ka surgeon nga indi mahapos ang mangin isa ka doktor kag propesyonal sa pag-opera sa lawas sang isa ka tawo.
Sa interview sang Bombo Radyo kay Dr. Roylen Java Fantillan, Medical Specialist sa Ramon Maza Sr. Memorial Hospital sa Sibalom, Antique, iya ginpahayag nga nagtuon ini sang pulo ka tuig antes nga mangin isa ka propesyonal nga doktor.
Suno kay Fantillan, bilang isa ka surgeon, kinahanglan nga may maayo nga hand and eye coordination kag critical thinking skills bangud indi gilayon mapat-ud kon ano ang matabo sa pasyente samtang ini ang ginpaidalom sa operasyon.
Ginpahayag man sini nga dapat “in a snap of a finger” madasig nga magdesisyon sa kon ano ang masunod nga tikang nga himuon nga makapamaayo sa pasyente.
Gintumod man sang natungdan nga indi man malikawan nga makulbaan, apang bangud sa repetition nga nagakatabo sa tagsa ka operasyon, maabot ang tyempo nga masanay na lang sila nga mga doctor.
Nagnugyan man ini sa mga may tuyo nga mangin doctor nga mangin dedikado kag magtuon sang maayo agud malab-ot ang handom nga mangin professional doctor.
