𝗠𝗔𝗡𝗜𝗟𝗔 — Nagnawagan ang isa ka union sang mga mamumugon nga buhinan ang kontribusyon sa Philippine Health Insurance Company (PhilHealth) sa tunga sang manubo nga sweldo sang madamo nga mga empleyado kag pag-utilize sang gobyerno sang idle funds sang state health insurer.
Suno kay Federation of Free Workers (FFW) president Sonny Matula, indi patas nga buhinan ang gamay nga sweldo sang isa kon halos wala na sang bisan ano nga mabaton sa sweldo.
Ginpahayag man sini nga ang Republic Act 11223 ukon ang Universal Health Care Law nagasiling nga sa tagsa ka tion nga ang aktwal nga reserba magsobra sa kinahanglanon nga ceiling sa katapusan sang tuig, ang sobra sang PhilHealth reserve fund pagagamiton sa pagdugang sang mga benepisyo sang Programa kag sa pagpanubo sang kantidad sang mga kontribusyon sang mga katapo sini.
Ginpanawagan man sang Federation of Free Workers nga gamiton ang ginreport nga P89 billion nga wala magamit kag idle funds sang PhilHealth para sa pet projects, nga mahimo kuntani magamit sa pagpauswag sang healthcare system sang pungsod.
Una na nga nagreport sang numero si Independent health advocate Dr. Tony Leachon, nga suno sa iya mahimo gamiton sa pag-address sang mataas nga pagbayad sang premium kag pagpauswag sang manubo nga mga benepisyo sa ospital, kag iban pa.
Ang Department of Finance una nga nagdepensa nga ang paggamit sang wala magamit pundo gikan sa PhilHealth kag iban pa nga mga kumpanya sang estado “more prudent” sangsa paghulam ukon pagpatuman sang buhis.
Suno naman kay Vilma Garcia, Federation of Free Workers board member kag union president sang De La Salle Health and Medical Sciences Inc. Employees Union-FFW, ang misappropriation ang isa ka daku nga disservice sa mga mamumugon nga ginakinahanglan nga mag-amot sa mga pundo gikan sa gamay nga sweldo nga gutom ang ila nabaton.
Isa man ini ka dako nga lukdo sang mga propesyonal sa ikaayong lawas nga kulang ang sweldo kag ang mga barangay health workers nga wala gani nagabaton sang social protection.
Una na nga gin-aprubahan sang Regional Tripartite Wages and Productivity Board (RTWPB) ang P35-hike sa daily minimum wage sang mga mamumugon sa Metro Manila sa diin nagsaka ini halin sa P610 tubtob P645 para sa non-agriculture sector.
Apang ginpahayag sang Trade Union Congress of the Philippines (TUCP) nga kulang sa gihapon ang P35-hike sa daily minimum wage sang mga mamumugon sa capital region.
