Nagalalain ang tag-iya sang motorsiklo sa Brgy. Quintin Salas, Jaro, matapos nga ginkawat ang iya motor kahapon nga adlaw, Pebrero 11.
Ang ginkawat nga motor amo ang XRM Honda nga may duag pula, puti kag itom kun sa diin may temporary plate number ini nga 080103.
Sa interview sang Bombo Radyo sa nagapanag-iya sang motor nga si Alyas Joni, iya ginpahayag nga bata niya nga estudyante ang naggamit sang motorsiklo kun sa diin angkas man niya ang iya utod nga babayi antes nadula.
Pahayag niya nga ginbilin lang sa bahin sang nasambit nga barangay ang motorsiklo bangud nga naga-commute ang mga ini pakadto sa ila nga tutor sa San Vicente, Jaro.
Sang nagapakadto na sila sa ila motor, nakit-an pa sang bata sini nga babayi nga daw ila motor ang gamit sang isa ka lalaki apang ginbalewala niya ini.
Sang nag-aot na ang mga ini sa lugar nga ginbilinan sang motor, wala na nila ini makita kag nagdesisyon nalang nga magpauli agud pamangkuton ang ila amay kun siya ang nagkuha sang motor.
Matapos nila nga makapauli, didto nila sang nakumpirma nga wala ang ila amay nagkuha ukon naggamit sang nadula nga motorsiklo.
Nagpahayag naman ang isa ka parking boy nga nakit-an sini ang suspek apang wala siya sang ihibalo nga amo ini ang nagkawat sang motor.
Sa interview sang Bombo Radyo kay Alyas Alog, iya ginpahayag nga posible nga matudlo niya ang suspetsado ilabi na kun makita niya liwat ang itsura sini.
Suno sa iya, madasig man nga napaandar sang motornapper ang ginkawat nga motorsiklo, rason nga wala man siya nagduda diri.
