ILOILO CITY- Patay ang isa ka miyembro sang New People’s Army sa nagluntad nga engkwentro sa Barangay Cabatangan, Lambunao, Iloilo kaina sang aga.
Suno kay Lt. Col. J-Jay Javines, spokesperson sang 3rd Infantry Division (ID) sang Philippine Army, nakaengkwentro sang 61st Infantry Battalion (IB) ang katapo sang Regional Headquarters (RHQ), Kometing-Rehiyon Panay kag Central Front.
Pahayag ni Javines, ini man ang grupo nga naka-engkwentro sang 12th Infantry Battalion (IB) sa Barangay Aglonok, Calinog kahapon.
Base sa imbestigasyon, natabo ang engkwentro sang naguwa ang ginabanta tatlo ka miyembro sang rebelde nga grupo sa ila ginapanaguan agud mangita kuntani sang ila kalan-on.
Wala pa natumod ang identity sang napatay terorista.
Narekober naman sa lugar sang encounter ang M16 rifle, war materials kag iban pa nga personal nga pagkabutang sang mga rebelde.
Matandaan nga sa engkwentro sa Calinog kahapon, patay si Benjamin Cortel nga residente sang Barangay Cochero, Molo, Iloilo City kag nagaserbe nga political officer sang grupo.
