ILOILO CITY – Pilason ang isa ka minor de edad matapos nabun-an sa nagluntad nga gang war sa saguwa sang Iloilo Fishing Port Complex Sa Brgy. Tanza Baybay, Iloilo City.
Ang biktima ang ginkilala nga si alyas Boyboy samtang nabuklan naman sa ulo ang kaupod nga si Rinz Anthony Mahusay, 18, Brgy. North Baluarte, Molo, Iloilo City.
Sa exclsuive interview sang Bombo Radyo kay Mahusay, iya ginpahayag nga naglabay sila sa Iloilo Fishing Port Complex sang hinali lang nga ginhaboy sila sang botelya sang wala makilala nga grupo sang kabataan.
Bangud sini, gilayon siya nga nagpauli sa ila balay kag nagkuha sang kutsilyo bilang pangaman tubtub nga nabun-an sa pulso ang iya abyan nga si alyas Boyboy.
Ginapahayag nga sadto, may ginbuno man si alyas Boyboy kag mahimo nga nagbalos lang ang grupo sang mga pamatan-on.
Gilayon nga gindala sa hospital si alyas Boyboy samtang wala naman madakpan ang mga pamatan-on nga nagtuga sang kinagamo.
Samtang, gin-athag sang Barangay Kagawad sang Tanza Baybay, Iloilo City nga wala sang natabo nga gang war sa ila barangay.
Sa interview sang Bombo Radyo kay Barangay Kagawad Denmark Deocampo, iya ginpahayag nga sanday alyas Boyboy kag Rinz Anthony Mahusay ang nakita niya nga nagpanghaboy sang botelya sa atubang sang ila tanod outpost.
Suno kay Deocampo, sawayon niya kun tani ang duha nga indi na magpalapit sa outpost bangud mahimo maigo ang mga magagmay nga mga kabataan apang sa baylo nga magpati, nagpanghaboy na sang botelya ang duha ka pamatan-on.
Ang pilas naman ni alyas boboy suno kay Deocampo amo ang tuga sang pagkadakop sa iya sang isa ka tanod samtang nadakpan naman nga may yara sang kutsilyo si Mahusay.
