ILOILO CITY – Ginkumpirma ni Punong Barangay Cesar Espinosa nga residente sang Brgy. Sto. Niño Sur, Arevalo, Iloilo City ang isa nga nagdugang sa kumpirmado nga kaso sang Coronavirus Disease 2019 (COVID-19) nga na record kahapon, Mayo 10.
Sa interview sang Bombo Radyo kay Espinosa, iya ginpahayag nga ang nasambit nga pasyente amo ang utod sang Barangay Health Worker nga una nga nagpositibo sa COVID-19.
Suno kay Espinosa, antes pa man nakumpirma, nagapaidalom na sa quarantine ang nasambit nga pasyente nga isa sa mga naka-angkon sang close contact sa Barangay Health Worker.
Ginpahayag ni Espinosa nga pending sa gihapon ang resulta sang laboratory test sang kadam-an nga may yara sang close contact sa COVID-19 positive.
Sa pihak sini, gindula sang Punong Barangay ang kahangawa sang pumuluyo bangud nga nagatinir sa quarantine facility ang tanan nga COVID-19 patients kag padayon man ang disinfection sa lugar.
Nahibalu-an nga sang damlag lang, ginpaidalom sa Extreme Enhanced Community Quarantine ang nasambit nga lugar bangud sa local transmission sang COVID-19 kag ini man ang rason kun nga-a wala sa gihapon napanghatag ang cash assistance sa Social Amelioration Program.
