Isa pa ka call center agent ang ginpulihan kastigo sa San Rafael, Mandurriao, Iloilo City.
Ang biktima amo si Jereck Sano.
Sa interview sang Bombo Radyo kay Sano, iya ginpahayag nga nagalakat ini sa area sang may nasumalang ini nga duha ka motorsiklo nga may sakay nga tag-tatlo ka tawo.
Suno kay Sano, hinali lang nga nagpalapit sa iya ang anom ka mga lalaki nga sakay sang mga motorsiklo kag ginpalibutan siya sang mga ini.
Nagdalagan ang biktima apang ginlagas ini kag nalab-ot sang mga lalaki.
Isa sa ila ang may ginauyatan pa nga kutsilyo.
Suno sa iya, magluwas nga ginsakit siya sang mga suspek, ginkuha pa sang mga ini ang dala niya nga grocery items kaangay sang diaper kag gatas nga para sa iya duha ka bulan pa lang nga bata.
Ginkuha man sang mga suspek ang iya cellphone.
Suno sa biktima, may mga tabon sa nawong ang mga lalaki apang sa iya pagbanta, mga menor de edad ang mga ini.
Nagapati man ini nga ginsaskuhan lamang siya kag mangawat gid ang tuyo sang mga suspek bangud wala man ini sang nahibaluan nga may nakaaway ukon kontra sa lugar.
Matandaan nga kahapon, nakastiguhan man ang call center agent nga si Junelle Baldon samtang yara ini sa SM Strata kun sa diin indi man niya kilala ang mga suspek kag possible nga gintrippinang amang ini.
Ang duha ka insidente ang halos magkasunod lang nga natabo kahapon sang kaagahon.
