Ginkumpirma na sang Philippine Embassy sa Ankara ang kamatayon sang isa pa ka Filipina kag sang iya tatlo ka kabataan kasunod sang 7.8 magnitude nga linog sa Turkey sang nagligad nga semana.
Sa statement nga ginpaguwa sang embahada, ginpahayag nga nalubong na sang Turkish husband sang Pinay ang iya nga asawa kag amo man ang mga bata.
Ini nga casualties ang una na na-report nga missing kasunod sang linog. Separado ini sa duha na ka nauna na-report nga overseas Filipino workers nga napatay man bangud sa nasambit nga kalamidad.
Gin-report man sang embassy nga may yara subong sang 20 ka mga pamilya nga ginatatap sa shelter. Nakapakigkita man ang embahada sa masobra 70 ka mga Pinoy nga nag-desisyon nga magpabilin sa ila puluy-an sa nagkalain-lain nga probinsya sa Turkey.
Masobra na sa 46,000 ang kumpirmado nga patay sa Turkey kag Syria halin sang natabo ang linog apang padayon pa nga nagasaka ang death toll tubtub subong. ##
