May isa na naman ka pyramiding scam nga gintumod ang National Bureau of Investigation (NBI).
Ini amo ang Alcoins Digital Marketing nga ginpahayag ginapanag-iyahan ni Aljean Padua nga may main office sa Caloocan, Metro Manila.
Sa interview sang Bombo Radyo kay alyas Inday, isa sa mga investor sang Alcoins Digital Marketing Services, iya ginpahayag nga nakita niya ang nasambit nga kompaniya sa facebook.
Diri kag nagganyat siya bangud sa tanyag sang kompaniya nga magdoble ang iya gin-invest nga kwarta.
Ang maximum nga i-invest suno sa natungdan ang nagadangat sa P20, 000 kag magadoble ini sa sulod sang isa ka semana.
Suno kay Inday, nagpadala siya sang mensahe pinaagi sa messenger kay Padua, kag sang ginpangayuan na niya ini sang mga ID, may ginpakita man ini nga mga dokumento.
Apang suno sa natungdan, madamo sang mga alyas nga ginagamit si Padua.
ON INVESTMENT
Disyembre 26, nagpadala si Inday sang P2,000 kay Padua.
Disyembre 29, nagpadala naman ini liwat sang P8,000.
Enero 2, 2021 nagpadulong si Padua sa Roxas City, Capiz agud makigkita sa madamo niya nga myembro.
Sang amo nga adlaw, nakabaton si Inday sang una nga payout nga P2,000.
Enero 9, nakabaton man siya sang P8,000 nga payout.
Matapos ang pito ka-adlaw nga pagpayout, hatagan naman sila sang voucher agud makapayout matapos ang 15 days.
Kun myembro na ang isa ka tawo sang Alcoins Digital Marketing, entitled na ini sa 20 percent nga Digital Resilience Bonus (DRB).
Diri na kag mahimo nga makapayout sang P10,000.
ON EMPLOYMENT AT ALCOINS
Enero 18-23, gintanyagan si Inday ni Padua nga mangin On the Job Trainee (OJT).
Enero 19 sang gintanyagan naman siya nga mangin manager sa diin ang trabaho sini amo ang pag-orient sang mga kliyente, pagverify sang mga voucher kag pagremit sang cash.
Apang sang Enero 24, wala na nagpakita si Padua kaupod ang iya nga partner sa negosyo nga si Ms. Maicang Rasonable.
Gintuad ni Inday nga naglab-ot sa million ang iya gin-invest nga kwarta nga ginhatag sang iya himata.
Sa subong may patong na sa ulo si Padua nga P150,000.
