ILOILO CITY – Ginkumpirmar sang isa ka Pro-Kremlin separatist sa Ukraine ang kamatayon sang isa pa ka Russian general sa padayon nga pagpang-atake sang Moscow sa amo nga pungsod.
Ang kamatayon ni Major General Roman Kutuzov nga commander sang 1st Army Corps ang gin-report sang war correspondent para sa Russian state TV apang wala ginkumpirmar sang mga opisyal sang Moscow.
Nagpalab-ot sang pag-unong ang lider sang pro-Russian separatist sa Donetsk nga si Denis Pushilin sa mga pamilya kag abyan ni Kutuzov nga nagpakita sang maayo nga ehemplo kun paano magserbe sa pungsod Russia.
Ang announcement ang kasunod sang pagpatigayon sang Russian forces kag sang ila separatist allies sang major assault sa eastern Donbas region.
Sang nagsugod ang kinagamo sa Ukraine, ginpahayag sang mga opisyales sang pungsod nga madamo na nga top officials sang Russian army ang nagtaliwan apang indi mapat-ud ang numero.
Sang Marso, napatay ang deputy commander sang Black Sea fleet sang Russia nga si Andrei Paliy samtang sang Abril naman, ginlubong si Major General Vladimir Frolov matapos ang ginakabig nga “heroic death” sa Ukraine.
