Ginatinguhaan pa sang kapulisan nga matumod ang isa pa ka suspek sa paglampos-patay sa isa ka panday sa Barangay Namocon, Tigbauan, Iloilo.
Ang biktima sa amo nga insidente amo si Reymond Dilig Tuburan, 41, kag residente sang amo nga barangay.
Una na nga na-identify ang isa ka suspek nga si Romvic Tumalaytay, residente man sang amo nga lugar, nga nadakpan sa hot pursuit operation kag positibo nga na-identify sang lima ka tuig nga bata sang biktima nga nakakita mismo sa krimen.
Sa interview sang Bombo Radyo kay Police Captain Alfred Mansoy, officer-in-charge sang Tigbauan Municipal Police Station (MPS), iya ginpahayag nga indi makilala sang bata kun sin-o ang isa pa ka suspek apang ginlaragway ini nga lalaki kag malaba ang buhok.
Gindugang ni Mansoy nga “John Doe” lang anay ang ibutang nila sa ipasaka nga panumbungon pareho man sa atubangon ni Tumalaytay.
Pahayag ni Mansoy, todo-panginwala man ang nadakpan nga suspek sa akusasyon nga siya ang naghimo sang krimen.
Matandaan nga halin sa highway ang biktima samtang angkas ang iya lima ka tuig nga anak, kag sang malapit na sa ila nga balay, ginlambatan sila sang duha ka lalaki kag ginlampusan ang biktima sang ginabulubanta tatlo ka tapak nga kalabaon nga kahoy.
Sang nalab-ot sang Bombo Radyo si Eden Tuburan, 38, asawa sang biktima, ginpahayag sini nga nagapati siya nga naangot sa iligal nga droga ang krimen.
Gintuad sini nga nagagamit sang illegal drugs ang iya bana apang wala sini makita ukon maaktuhan bangud sa kamalig ini nagagamit. Pahayag niya, apisar nga nagagamit ang iya bana, ginatungdan ini sa gihapon ang iya responsibilidad bilang amay.
