Ginbawian sang kabuhi ang isa ka residente sang Barangay Sto. Niño, Norte, Arevalo, Iloilo City matapos nagpositibo sa COVID-19.
Sa interview sang Bombo Radyo kay Barangay Kagawad Rolando Robles, iya ginpahayag nga sang una nga naglain ang pamatyag sang isa ka nila ka pumuluyo, nagpakuha pa ini sang blood pressure sa ila nga barangay kag nagpakonsulta sa ila nga health center.
Matapos sini suno kay Robles, nagpa-admit na ini sa ospital sa diin natukiban nga nagpositibo ini sa COVID-19 kag makaligad ang isa ka-adlaw, ginbawian ini sang kabuhi.
Sa subong suno natungdan, ginpaidalom na sa istrikto nga quarantine ang pamilya sang nagtaliwan bangud sa amo nga virus lakip na ang close contact samtang ginahulat pa ang resulta sang ila reverse transcription polymerase chain reaction (RT-PCR) test.
Samtang suno naman kay Jocelyn Alcala, Barangay Health Worker, iya ginpahayag nga nagsaka na sa 10 ang numero sang mga naclose contact sang amo nga residente sang ila lugar nga ginbawian sang kabuhi bangud sa COVID-19.
Sa interview sang Bombo Radyo kay Alcala, iya ginpahayag nga ang mga close contact ang ginalakipan sang myembro sang pamilya sang nagtaliwan kag pila ka mga indibidwal nga nagbulig sa pasyente agud madul-ong sa ospital.
Suno sa natungdan, lunsay nakaqurantine na subong ang dugang nga mga close contact sa diin ginahulat na lang ang resulta sang ila swab test.
Padayon naman suno sa health worker ang kampanya sang ila barangay agud matapna ang paglatnanay sa COVID-19.
