ANTIQUE – Isa ang patay kag isa ang kritikal matapos maaksidente ang patrol vehicle sang Culasi Municipal Police Station sa Barangay Bungsod, Sibalom, Antique.
Sa interview sang Bombo Radyo kay Police Captain Bryan Ignacio Alamo, hepe sang Culasi Municipal Police Station, iya ginpahayag nga walo ang sakay sang ila nga patrol car.
Lakip diri ang tatlo ka on-duty nga uniformed personnel, off duty nga pulis, pulis nga naka-designar sa lain nga police station, kag tatlo ka job order (JO) workers.
Magadul-ong kuntani sang importante nga dokumento sa Antique Police Provincial Office ang uniformed personnel sang natabo ang aksidente.
Ginkumpirma ni Alamo nga job order worker ang ginbawian sang kabuhi sa ospital.
Ginapahayag nga maga-overtake kuntani ang patrol car sa likuan nga bahin sang Barangay Bungsod apang gulpi lang nga nag-left turn ang motorsiklo sa unahan rason nga naglikaw ang patrol car kag nadulaan sang kontrol.
