SAN DIONISIO, ILOILO – Isa ang patay samtang isa ang kritikal matapos nabungguan sang pick-up nga salakyan ang motorsiklo sa Brgy. Cudionan, San Dionisio, Iloilo.
Ang mga biktima amo sanday Jerson Gonzales kag Nyron Benliro, lunsay 17 anyos sang Sara, Iloilo.
Sa report ni Bombo Alumni Association Member Nenen Barnuevo, sanday Gonzales kag Benliro ang sakay sa motorsiklo kag nagapaguwa na sa compound sang isa ka simbahan sa nasambit nga barangay sang natabo ang aksidente.
Ginapahayag nga padulong sa banwa sang Sara ang duha sang nabunggu-an sang nagasunod kag nagahagunos nga pick-up nga salakyan nga ginamaneho sang wala pa makilala nga driver.
Sa unhan kun sa diin nagapondo ang motorsiklo nga ginaskayan sang duha, may yara sang ginakay-o nga dalan apang bangud nga madulom, wala nakita ang early warning devices.
Bangud sa kabaskugon sang pagbunggo sang pick-up, nagtabog sa talamnan ang motorsiklo samtang nagtabog naman sa karsada ang duha ka mga biktima nga naka-angkon sang madamu nga pilas sa lawas.
Ginapahayag nga dead on the spot si Gonzales bangud sa head injury samtang padayon naman nga ginabulong sa hospital si Benliro.
Bangud sa natabo, ginapahayag nga wala napunggan sang amay ni Gonzales nga magpabutyag sang kaugot kag ginpanglampos ang early warning devices sa lugar kun sa diin nagluntad ang insidente.
Sa subong, nagahingyo ang pamilya sang duha nga magsungka na lang ang driver sang pick-up nga salakyan.
