ILOILO CITY – Isa ang patay kag isa ang pilason matapos ginpangbuno sa Barangay Sto. Domingo, Barotac Viejo, Iloilo.
Ang napatay amo si Mark Baldonasa, 42, samtang ang pilason naman amo si Jevie Batermonia, 21, lunsay mga residente sang nasambit nga lugar.
Ang suspek naman amo si Herman Paderes.
Sa interview sang Bombo Radyo kay Police Major Ciriaco Esquilarga, hepe sang Barotac Viejo Municipal Police Station, iya ginpahayag nga natabo mismo ang pagpangbuno sa balay sang suspek.
Suno kay Esquilarga, nagpangayo sang bulig ang live-in partner sang suspek matapos nga iya ini ginsakit.
Diri kag nagpadulong ang mga biktima sa balay sang suspek agud buligan ang iya live-in partner.
Apang ginpangbuno sang suspek ang mga biktima.
Nag-angkon sang patal nga pilas sa dughan si Baldonasa nga amo ang gintunaan sang iya kamatayon.
Samtang may pilas naman sa tiyan si Batermonia nga sa subong, padayon nga ginabulong sa ospital.
Sa subong, preso na ang suspek matapos nadakpan nga nagpanago sa Barangay San Salvador, Banate, Iloilo.
