ILOILO CITY – Isa ang patay, isa ang pilason matapos nagbunggu-anay ang duha ka mga motorsiklo sa Barangay Sto. Tomas, Passi City.
Ang ginbawian sang kabuhi amo si Rio Pacino, 39, samtang ang nagapabilin sa ospital amo si Eljhon Postremo, 19, lunsay mga residente sang Barangay Bita-ogan, Passi City.
Sa interview sang Bombo Radyo kay Police Staff Sergeant John Hersley Fajardo, imbestigador sang Passi City Police Station, iya ginpahayag nga nag-overtake si Pacino sa ginasundan nga isa pa ka motorsiklo kag wala natalupangdan ang nasugata nga motorsiklo nga ginamaneho ni Postremo.
Bangud madasig man ang pagpadalagan sang duha ka mga motorsiklo, mabaskog ang impact rason nga naguba gid ang helmet ni Postremo nga posible amo ang nakalampos sa ulo ni Pacino.
Gindala pa sa ospital si Pacino apang ginbawian sang kabuhi samtang si Postremo naman ang gin-refer sa Iloilo City bangud sang madamo nga fracture sa iya lawas.
Ginahulat pa sang kapulisan ang mangin desisyon sang duha ka mga pamilya.
