Patay ang isa ka arestado nga lalaki kag pilason ang tatlo ka mga police personnel sang Batad Municipal Police Station matapos nga nahulog ang patrol car sang Batad sa Barangay Natividad, Barotac Viejo.
Ang lalaki amo si John Baldomero, 44-anyos, residente sang Barangay Alinsulong, Batad.
Samtang, ang tatlo ka mga police personnel ang ginkilala kanday Police Master Sergeant Renante Fuentes (driver), Police Master Segeant Francis John Aricaya kag Police Corporal Joseph Asturias.
Sa interview sang Bombo Radyo kay Police Major Ciriaco Esquilarga, Hepe sang Barotac Viejo Municipal Police Station, iya ginpahayag nga halin ang patrol car sa PNP Crime Laboratory sa Camp Delgado, kun sa diin ginpaidalom sa drug test ang arestado sa drug buy-bust nga si Baldomero.
Suno kay Esquilarga, pabalik na kuntani ang patrol car sa banwa sang Batad sang gulpyada nga nagdapya ang mabaskog nga tubig sa windshield sang salakyan rason nga indi makita sang driver ang dalan kag ini ang nakabunggo sa gutter kag poste sang telco.
Dugang pa sang natungdan, matapos nga nakabunggo ang patrol car sa poste nadulaan ini sang control kag nahulog sa madalom nga porsyon sa kilid sang dalan.
Gin-athag man ni Esquilarga nga nawasak gid ang kilid kag likod nga bahin sang patrol car.
Samtang, wala naman makahalin si Baldomero sa iya ginapungkuan bangud man sa ini ang nakaposas rason nga nakaagum ini sang patal nga pilas sa ulo nga gintunaan sang iya kamatayon.
Gilayon man nga gindala sa Governor Niel D. Tupas Sr. Memorial District Hospital sa Barotac Viejo ang mga biktima, apang gindeklarar nga dead on arrival si Baldomero.
