ILOILO CITY – Wala pa natapos ang 18th Congress sa senado apang may yara na sang mga incumbent senators ang nagpahayag sang ila intensyon nga magpamuno sang 19th Senate congress.
Ang ginapanan-aw nga mangin Senate president amo sanday Senator Cynthia Villar, Majority Leader Juan Miguel Zubiri, presumptive senator kag Sorsogon governor Chiz Escudero kag Senator Win Gatchalian.
Suno kay Senator Sonny Angara, may yara na sang nagapadayon nga istoryahanay nga nagatuyo nga magsanto sanday Zubiri kag Villar.
Ang duha pa gid lamang suno kay Angara ang nagpahayag sang ila intensyon nga mangin senate presidente.
Ang pahayag ni Angara ang nagsanto man sa pahayag ni senator JV Ejercito apang suno sa iya, si Escudero ang interesado man.
Suno kay Ejercito, si Villar ang ginatawag nila nga ‘mama bear’ samtang si Zubiri naman ang daw kaangay sang isa man ka lider.
Sa ginpagwa nga statement sang nagligad nga semana, ginpanginwala ni Zubiri nga may intention nga mangin senate president.
Sa bahin naman ni Villar, wala pa ini sang may ginpagwa nga pahayag bangud suno sa iya media team, tuman pa ka temprano agud diskusyunan ang amo nga bagay.
Ginpahayag naman ni Gatchalian nga interesado siya.
Suno naman kay outgoing Senate President Vicente Sotto III, nagakadapat nga ang masunod nga senate president ang may ihibalo sa parliamentary rules and procedures, isa ka consensus-builder, independent-minded, seryoso apang compassionate, dapat nga yara pirmi kag wala nagaka-late.
Ang 18th Congress ang magatakop na sa Hunyo 3 samtang ang 19th Congress naman ang magasugod sa Hulyo 25.
