ILOILO CITY – Ginkumpirma sang pinuno sang Plant Operations sang AC Energy nga empleyado sang Ayala Corporation owned energy platfrom ang COVID-19 positive nga nagpadulong sa Iloilo City Hall kun sa diin naka-angkon sang close contact si Mayor Jerry Treñas.
Sa interview sang Bombo Radyo kay Ganibo Ramon Mejia, pinuno sang Plant Operations sang AC Energy, iya ginpahayag nga ang duha ka COVID-19 positive ang lunsay may posisyon nga Assistant Vice President kag nagpadulong sa syudad sang Iloilo sang Hulyo 27.
Suno kay Mejia, gilayon nga nagpakuha sang swab sample para sa COVID-19 test ang duha kaopisyal sang kompaniya kag nakumpirma lamang nga positibo sila sa virus pagkatapos nga mahatag ang donasyon sa Iloilo City Hall.
Ginpahayag ni Mejia nga asymptomatic ang duha ka pasyente kag nagapaidalom na sa quarantine apang luyag niya athagon nga isa lang ka COVID-19 positive ang nakapadulong sa talatapan sang alkalde.
Wala sang exposure sa komunidad ang mga pasyente bangud nagapatigayon sila sang meeting paagi sa online kag ang mga staff lamang nila ang may yara sang direct exposure.
Bilang protocol, ginpahayag sang natungdan nga magapaidalom siya sa COVID-19 test lakip na ang tanan nga staff agud nga makasiguro kag kinahanglan nila nga mag-quarantine samtang ginahulat ang resulta.
