ILOILO – Patay ang duha ka menor de edad kag isa ang pilason matapos nakabunggo ang ila ginasakyan nga motorsiklo sa Bangga Utok, Bonifacio Street, Dumangas Iloilo.
Ang duha ka patay amo sanday Remmy Maglaya kag John Lloyd Dequilla kag residente sang Brgy. Ermita Dumangas, Iloilo.
Samtang ang pilason naman amo si Melbert Fernandez, residente man sang nasambit nga lugar.
Sa exclusive interview sang Bombo Radyo kay Pmaj. Joeven Arevalo, hepe sang Dumangas Municipal Police Station, iya ginpahayag nga lunsay yara sa impluwensya sang makahulubog nga ilimnon ang mga biktima.
Suno kay Arevalo, nawasak ang motorsiklo sang mga biktima kag naglapta pa ang utok sang isa sa napatay nga menor de edad.
Gilayon pa nga gindala sang mga otoridad ang mga biktima sa Dumangas, Hospital, apang gindeklara nga dead on arrival na sanday Maglaya kag Dequilla samtang padayon naman nga ginabulong si Fernandez.
