Nakilal-an na ang isa sa duha ka mga suspek nga nagluthang-patay sa trisikad driver sa Barangay Balabag, Pavia, Iloilo.
Ini amo si Alias Aljun, 35 years old, kasado, jobless, residente sang Brgy Jereos, Lapaz, Iloilo City. Siya ang nagserbi man nga driver sang gun man nga sa subong, nagapabilin nga wala pa matumod ang identity.
Ang biktima amo si Wilfredo “Dudoy” Batican, residente sang Barangay Balabag, Pavia, Iloilo.
Sa interview sang Bombo Radyo kay Police Major Dadjie Delima, hepe sang Pavia Municipal Police Station, iya ginpahayag nga natumod ang isa ka suspek sa bulig man sang closed circuit television (CCTV).
Suno kay Delima, kuha sang CCTV sa Jereos, Lapaz ang nagtul-id sa isa ka mga suspek bangud idto sila nag-exit matapos nga ginhimo ang pagpaniro sa trisikad driver.
Ginbuyagyag man sini nga anay na may ginkaulamiran nga kaso sa grave threat ang suspetsado.
Padayon naman nga gina-ayam sang otoridad ang gun man nga nagapabilin nga ‘at large’.
Kon balikan, naga-inom-inom sang soft drinks ang biktima sang ginpalibotan ini sang duha ka mga suspek kag gulpiyada nga gintiro.
Nag-agum sang indi magnubo sa lima ka mga pilas ang biktima kon sa diin, gindala pa ini sa Western Visayas Sanitarium and General Hospital sa Sta. Barbara apang, gindeklara nga dead-on-aarival (DOA).
