ILOILO CITY – Napun-an sang kasubo ang lubong ni Alain Muller, ang isa sa mga biktima sang twin shooting incident sa syudad sang Iloilo.
Kaina sang hapon sang gindul-ong sa iya ulihi nga palahuwayan si Muller.
Ang misa ang ginpatigayon sa simbahan sa Alta Tierra Village, Jaro, Iloilo City kag ang lubong sa Jaro Catholic Cemetery.
Madumduman nga ang utod sang biktima nga si Mark Muller ang ginluthang-patay man sang nakaligad nga tuig bangud sa ginapahayag kaangtanan sa illegal drugs.
Nahibalu-an nga magluwas kay Muller, isa man sa ginbawi-an sang kabuhi amo ang negosyante nga si Delfin Britanico sa Brgy. Nabitasan, La Paz, Iloilo City.
Nauna na nga ginpahayag sang pamilya Britanico nga nagpromisa na si Presidente Rodrigo Duterte nga magabulig agud nga mahatagan sang hustisya ang biktima.
May kaangtanan diri, hustisya sa gihapon ang handum sang pamilya Muller.
Sa interview sang Bombo Radyo kay Anabelle Estrella, tiya ni Alain Muller, iya ginpahayag nga nagapangamuyo na lang sila nga mahatagan sang National Bureau of Inverstigation sang kasanagan ang kaso sang biktima.
Suno kay Estrella, masakit ang gindangatan sang iya hinablos apang nagapanawagan sila sa gobyerno nga dapat mahatagan sang hustisya ang kamatayon sang mga inosente nga nabiktima sang riding-in-tandem suspects.
Sa subong, ginpahayag sang pamilya nga may NBI team na nga nagapatigayon sang imbestigasyon agud matumod ang mga suspek sa krimen.
Sa Pebrero 1 naman ang lubong sang negosyante nga si Delfin Britanico.
Sa interview sang Bombo Radyo kay anay Banat Partylist Rep. Salvador “Buddy” Britanico, iya ginpahayag nga nagapati siya nga colateral na gid lamang ang kamatayon sang iya anak nga si Delfin.
Suno kay Britanico, mahimo nga road rage ang natabo bangud nga pagkatapos sang krimen, wala man nadula ang malahalon nga gamit sang iya anak magluwas sa cellphone.
Magluwas sa road rage, malayo man nga ang natabo kay Delfin ang may kaangtanan sa pagluthang-patay Alain Muller bangud nga indi man sila magkilalahay nga duha.
Sa subong, ila na lang nga ginatugyan sa National Bureau of Investigation ang pagsolbar sang kaso bangud nga nagapadayon ang imbestigasyon.
