ILOILO – Pinasahi ang nangin estilo sa pagtudlo sang isa ka practice teacher matapos nalakip sa mga finalists sang Most Outstanding Practice Teacher sa bilog nga West Visayas State University.
Ini matapos nakuha niya ang atensyon sang iya mga estudyante pinaagi sa paglakip sang iya rap skills sa iya demonstration sa pagtudlo.
Sa interview sang Bombo Radyo kay France Banguiran, 4th year college student nga nagakuha sang kurso nga Bachelor of Secondary Education Major in English kag tumandok sang Pototan, iya ginpahayag nga high school pa lang, may yara na ini sang koneksyon sa English language bangud masami ini nga naga-intra sa mga literary contests kaangay sang declamation kag journalism.
Suno kay France, mapalaron ini nga malakip kaupod sang apat ka iban pa nga mga finalists nga naga-excel sa tagsa ka subject of expertise.
Ginpahayag dugang sang natungdan nga apisar indi bastante ang oras sini sa pagpreparar sang material, malipayon ini nga nangin maayo ang resulta sang demonstration sa diin napilian sini ang topiko natuhoy sa logical fallacy.
Diri na kag ginhatagan ang practice teacher sang 15 minutos agud maghatag sang motivation, abstraction, kag asessment sa mga Grade 10 Integrated Laboratory School students sa diin nangin automatic crowd favorite ini.
