ILOILO CITY – Ginpanginwala sang isa sa mga ginatudlo suspek nga may kaangtanan siya sa ginapahayag pag-gang rape sa isa ka 16 anyos nga solterito sa Brgy. Calumpang, Molo, Iloilo City.
Sa exclusive interview sang Bombo Radyo kay alyas Johnray, abyan sang biktima nga si alyas Tonton, iya ginpahayag nga indi matuod nga siya ang nagserbe nga bugaw.
Suno kay Johnray, antes pa man ang nasambit nga insidente nga ginapahayag natabo sang Agosto 25, nakita pa niya ang social media post ni Tonton nga nagahingyo nga hagadon siya nga magguwa rason nga iya man ini nga gin-replyan.
Ginpahayag ni Johnray nga nagkadto sa ila balay si Tonton kun sa diin sila nag-inum kaupod sanday Jeffrey kag William.
Pagkasunod nga adlaw suno kay Johnray, nagpaligo pa sila sa baybay antes nagpadulong sa distrito sang La Paz agud makigkita sa isa pa gid niya ka abyan nga si Jerrick.
Sang yara na sila sa La Paz, ginpahayag sang natungdan nga magkaupod pa sila ni Tonton nga nagkaon.
Sa pagkamatuod suno kay Johnray, iya pa nga ginpasakay sa jeep si Tonton matapos ginsugo sang iya amay nga magpadulong sa Brgy. Calaparan sa Arevalo agud magkuha sang kwarta.
