ILOILO – Ginpanginwala sang pamilya sang isa ka arestado sa natabo nga engkwentro subong nga adlaw, Marso 16 sa Barangay Mañacabac, Janiuay, Iloilo nga myembro ini sang New People’s Army (NPA).
Ang isa sa duha ka arestado amo si Julie Lago, 59, residente sang nasambit nga barangay kag ginapatihan myembro sang Baloy Platoon sang Central Front sang Kilusang Rehiyon Panay sang NPA.
Sa interview sang Bombo Radyo kay Yolanda Abalorio, bayaw ni Lago, iya ginpahayag nga updanay sila sang iya bayaw sang nagsulod ang myembro sang 301st Infantry Brigade sang Philippine Army sa ila balay tubtun gin-aresto ini.
Suno kay Abalorio, wala man sang ubra ang iya bayaw bangud nakaagi na ini stroke kag may yara naman sang iban pa nga balatian.
Dugang pa sang natungdan, indi man nila mahangpan kun nga-a gindakop ang iya bayaw apisar wala man ini may ginhimo nga malain.
Samtang sa interview naman sang Bombo Radyo kay Police Captain Eleazar Climacosa, hepe sang Janiuay Municipal Police Station, iya ginpahayag nga ginbuy-an man si Lago matapos mapamatud-an nga wala siya sang kahilabtanan sa natabo nga engkwentro.
