Nagahilibion ang isa sa mga nasunogan matapos nga natupok gid sang kalayo kag nag-abo ang iya nga puluy-an kasunod sang nagluntad nga sunog sa Barangay San Pedro, Molo, Iloilo City.
Sa interview sang Bombo Radyo kay Maricar Francisco, isa sa mga nasunogan, iya ginpahayag nga nakibot siya matapos nga ginpahibalo nga nasunog na ang ila puluy-an.
Dali-dali naman nga nagpadulong ang natungdan sa lugar agud masalbar ang ila kagamitan apang, wala na gid ini sang naabtan.
Suno kay Francisco, naghalin pa siya sa Tigbauan, Iloilo kon sa diin siya nagatrabaho agud lamang nga balikan ang nasunog sini nga balay.
Ginabanta naman sang natungdan nga yara sa masobra sa P600,000 ang balor sang iya puluy-an nga ginlamon sang kalayo.
Nahibaluan nga may anom ka mga kwarto ang iya puluy-an kag lubos naman ang iya pagpasalamat nga nakaluwas ang iya pamilya sa makahalalit nga sunog.
