ILOILO CITY – Yara na sa kustodiya sang kapulisan ang isa sa apat ka mga suspek sa twin shooting incident sa diin ginluthang-patay sanday Alain Muller kag Delfin Britanico.
Sa interview sang Bombo Radyo kay Lt. Col. Gilbert Gorero, acting Public Information Officer sang Police Regional Office 6 iya ginpahayag nga base man sa mandu ni Police Regional Office 6 Director Police Brigadier General Rene Pamuspusan gilayon nga ginpaidalom sa restricted custody si PCpl. Jerry Carmelotes Villanueva tubtob nga wala pa sya naserbehan sang warrant of arrest.
Samtang, padayon pa nga ginapangita si PCpl. Joseph Andrew Poneles Joven bangud suno kay Gorero, madugay na ini nga wala naga duty matapos nga ginpasakaan sang duha ka kaso administratibo nga amo ang Grave Neglect of Duty ukon Absent without leave kag Less Grave neglect of Duty matapos nga wala siya nagpaidalom sa drug test nga ginpatigayon sang Iloilo City Police Office.
Suno kay Gorero, ginatahod man nila ang nangin imbestigasyon sang National Bureau of Investigation kag nagpasalig ang natungdan nga sila sa Police Regional Office 6 ang handa man nga magbulig kag maghatag sa mga kinahanglanon para sa imbestigasyon.
Gintinguhaan naman sang Iloilo City Police Office nga lab-uton ang bahin ni Joven paagi sa iya pamilya agud makuhaan ini sang specimen para sa drug test apang ang pamilya niya mismo ang wala nakahibalo sang iya nga lokasyon.
Sa interview sang Bombo Radyo kay Pol Capt Sangrines, tagapamaba sang Iloilo City Police Office iya ginpahayag base sa ila nga record wala sang iban pa nga kaso si Joven magluwas lang sa duha ka kaso administratibo nga ginpasaka sa iya sang damlag lang.
