ILOILO CITY- Nadakpan na ang isa sa tatlo ka mga suspek sa pagpatay sa solterito nga nasapwan sa higad sang karsada sa Barangay Daan Banua, Estancia, Iloilo sang damlag lang.
Ang biktima amo si alyas Nonoy, ginabanta 16 anyos ang edad.
Sa interview sang Bombo Radyo kay PMaj. Aldren Lamera, hepe sang Estancia Municipal Police Station, iya ginpahayag nga sa ginpatigayon nga hot pursuit operation, naaresto si Alberto Barrio, 30 anyos, residente sang Pontevedra, Capiz.
Suno kay Lamera, si Barrio ang nakit-an nga ulihi nga nakaupod sang biktima.
Ginpahayag sang hepe nga duha ka anggulo ang ginalantaw kon ngaa ginpatay ang solterito.
Suno sa natungdan, base sa imbestigasyon, involved ang menor de edad sa kinagamo kag mahimo nga ginpulihan ini sang grupo nga kaupod sang suspek tubtob nga napatay.
Magluwas diri, posible man nga may ginsugo ang suspek nga wala gintuman sang biktima rason nga ginpatay nila ini.
Gintuad man sang otoridad nga myembro sang LGBT community ang suspek kag may upod ini nga isa man ka LGBT member nga involved sa krimen sa Balasan, Iloilo.
Nahibaluan nga nakaangkoon ang biktima sang sisi sa ibabaw sang kilay, lagob sa nawong kag pilas sa iya kinatawo.
May na-trace man ang otoridad nga tinulo sang dugo halin sa lugar kon sa diin ini nasapwan pakadto sa Villa Morales sa amo man nga banwa nga nagapakita nga ginkarga pa ini sa salakyan kag ginhal-id sa kahilamunan.
Nagapadayon naman ang pagpangita sa duha pa ka mga suspek samtang may ginautayan naman nga testigo ang otoridad.
