Nahimo na nga isa ka tropical storm ang anay Tropical Depression Isang.
Sa latest bulletin sang weather bureau, nakit-an ang bagyo sa kalayuon nga 290 km nakatundan sang Bacnotan, La Union.
Dala sini ang kabaskugon sang hangin nga 65 km/h malapit sa sentro kag pagmadlos nga tubtub sa 80 km/h.
Nagahulag ini pa nakatundan sa kadasigon nga 25 km/h.
Napaidalom naman sa Signal number 1 ang masunod nga mga lugar:
- Ilocos Norte, Ilocos Sur, La Union, ang northern portion of Pangasinan, Apayao, Abra, Kalinga, Mountain Province, Ifugao, Benguet, ang western portion sang Cagayan lakip ang Babuyan Islands, ang western portion sang Isabela, kag ang northwestern portion sang Nueva Vizcaya
Ginapabaskog man sini nga bagyo ang Southwest Monsoon ukon Habagat nga nagaapekto pati na sa Western Visayas kag Negros Island Region.
Padayon nga magahulag ang bagyo pa nakatundan kag ginalantaw nga magaguwa man sa Philippine Area of Responsibility subong nga aga.
Ginalantaw nga magabaskog ini kag magalab-ot sa typhoon category samtang nagahinampot sa Hainan, China.
Sa pihak nga bahin, ang isa ka pa Low Pressure Area sa guwa sang PAR ang padayon man nga gina-monitor sang weather bureau kag may manubo nga tyansa nga mangin bagyo sa masunod nga 24 oras.
