Ginakabig ni Kalookan Bishop Pablo Virgilio David nga indi “dungog” kundi “katungdan” ang pag-appoint sa iya sang Vatican bilang cardinal nga amo ang ranggo nga nagapangaduha sa Santo Papa base sa hierarchy sa simbahan.
Pahayag sang 65-anyos nga obispo nga amo man ang presidente sang Catholic Bishops’ Conference of the Philippines (CBCP), ang pinaka-importante gihapon nga karakter sang iya serbisyo sa Simbahang Katolika amo ang iya pastoral responsibility bilang bishop sang diocese sa Kalookan.
“Ang pagiging cardinal ay hindi po ito honor. Ito ay isang responsibilidad,” pahayag ni Bishop David.
“Ako’y nananatili pa ring obispo. Para sa akin, ‘yun pa rin ang pinakaimportanteng karakter ng aking paglilingkod sa Simbahan — bilang isang obispo, obispo ng Kalookan.”
Ginsiling man sini nga ang pag-appoint sa iya amo ang paagi sang Santo Papa agud maghingyo sang bulig agud taytayan ang local nga mga simbahan sa ginatawag nga “Universal Church.” Iya ini gintawag nga Pontifex Maximus nga buot silingon Supreme Bridge Builder.
“Ang ibig sabihin pong sabihin para sa akin ng pagiging cardinal ay humihingi ng tulong ang ating Santo Papa na alalayan siya, suportahan sa kanyang gawain bilang Pontifex Maximus na ang ibig sabihin ay Supreme Bridge Builder — ang tagapagtayo ng mga tulay na nag-uugnay sa particular church at Universal Church,” paathag sini.
“Ito po ay pakikipagtulungan lang sa ating Santo Papa para manatili ang pagkakaisa ng mga local churches all over the world as one holy Catholic and Apostolic Church.”
Si Bishop Ambo amo ang ika-10 nga Filipino Cardinal nga gin-appoint sang Vatican.
Ang duha nga aktibo nga nagapangalagad subong amo sanday Cardinal Jose Advincula sang Manila kag si Cardinal Luis Antonio Tagle nga nagaserbe naman sa Vatican.
Ginpakigbahin man ni Bishop Ambo nga nagapahuway ini sang Domingo sang aga sa Roma sang ginbalita sa iya ang desisyon sang Santo Papa.
Ang nagpahibalo sa iya amo ang Ilonggo priest nga si Father Marvin Tabion nga amo ang Vice Rector kag Oeconomus sang Pontificio Collegio Filippino sa Rome.
Nagpinsar pa si Bishop Ambo nga lahog lang ang pagpanginbulahan sa iya apang gin-padala sa iya ang video nga si Pope Francis mismo ang nag-anunsyo sang iya appointment.
Nahibaluan nga didto subong si Bishop Ambo David sa Roma agud magtambong sa General Ordinary Assembly of the Synod of Bishops.
Na-eleher siya bilang CBCP president sang 2021 kag na-re-elect sang 2023.
Kilala siya nga vocal critic sang madinuguon nga war on drugs sang Duterte administration amo man sa red tagging.
Na-ordenahan siya bilang pari sa Archdiocese of San Fernando sang 1983, na-appoint bilang auxiliary archbishop sang amo man nga archdiocese sang 2006, kag ginsaylo sa Caloocan diocese sang 2015.
Napili man bilang masunod nga vice president sang Federation of Asian Bishops’ Conferences (FABC) sang February 2024 kag opisyal nga magapungko sa amo nga posisyon sa Enero 2025.#
