ILOILO CITY- Isa ka Ilongga ang nagpangibabaw sa bag-o lang gin-release nga resulta sang Licensure Examination for Architects.
Ini amo si Marianne Kaye Ledesma Ofianga sang La Paz, Iloilo City kag nag-gradwar sa kurso nga BS Architecture sa Iloilo Science and Technology University (ISAT-U) sang 2019.
Sa interview sang Bombo Radyo kay Ofianga, iya ginpahayag nga ang handom lamang niya amo nga makapasar sa amo nga pasinawan kag wala gid ini naglaum nga siya ang number sa 3,037 nga mga nakapasar gikan sa 4,766 nga nagkuha sang exam sini lang nga Hunyo.
Suno kay Ofianga, indi man mahapos ang iya nangin preparasyon para sa exam bangud ginkinahanglan niya nga magbag-o sang iya routine duha ka bulan antes siya nagkuha sang exam.
Pahayag niya, isa sa nangin sekreto niya amo ang pagkilala sa iya kapasidad ilabi na kun pagtuon kag pag-review para sa exam ang istoryahan.
Suno sa iya, bangud nga madasig siya malipat, nangin estratehiya niya sa pag-review amo ang sulit-sulit nga pagbasa tubtob nga ma-digest niya ini.
Apang labaw sa tanan, nagapati si Ofianga nga ang naghatag sa iya sang ikasarang nga mangibabaw sa exam amo ang pagpangamuyo kag pagsalig sa mahal nga Diyos.
Nagpasalamat man ini sa iya ginikanan nga nangin consistent sa pagsuporta sa iya.
Nagtapos sang iya elementarya si Ofianga sa Alphacrest Academy kag sekondarya sa Iloilo National High School-School of the Future.
