Magapatigayon sang Regional Training Workshop on Creative Writing nga gintawag nga Hiraya ang Iloilo Science and Technology University-Graduate School.
Natalana ini sa Mayo 22 tubtob 23 para sa mga estudyante, mga maestra kag mga indibidwal nga luyag ma-train sa ila nga talento sa creative writing particular na sa lenggwahe nga Filipino.
Sa interview sang Bombo Radyo kay Dr. Nat Gamuyao, Associate Professor II sang ISAT-U, iya ginpahayag nga isa sa mga katuyuan sang amo nga workshop amo ang paghanas sang talento sang mga kabataan kag educators sa patag sang creative writing kag paghatag sang tingog kag kabuhi sa mga ginsulat sang tagsa ka writer pinaagi sa ila mga obra.
Suno kay Gamuyao, importante ang ini nga training agud mapabaskog ang pagsulat kag mapahayag sang mga partisipante sa publiko ang ila mga ideya, eksperyensya kag kultura paagi sa literature.
Ginpahayag man sini nga mga kilala kag dungganon nga mga Palanca Awardees ang mangin resource speakers sang amo nga aktibidad agud maghatag sang inspirasyon kag praktikal nga mga ihibalo sa mga partisipante.
Bukas ang workshop sa sin-o man nga interesado nga luyag pasangkaron pa ang ihibalo sa pagsulat.
