ILOILO CITY- Ginkalipay sang pamunuan sang Iloilo Science and Technology University nga nangin partner sang Bombo Radyo Philippines sa Dugong Bombo 2019.
Sa iya nangin mensahe sa opening program sang Dugong Bombo, ginpahayag ni Dr. Raul Muyong, presidente sang Iloilo Science and Technology University,nga bugal para sa iya nga ang nasambit nga unibersidad ang napili-an sang network nga mangin venue sang Dugong Bombo.
Ginpahayag ni Dr. Muyong nga ila gid ginpreparar sang maayo ang mga pasilidad sang unibersidad nga ginpatigayunan sang blood-letting activity.
Ginpasalamatan man ni Muyong ang tanan nga nagvolunteer kag nakigbahin rason nga nangin madinalag-on ang isa na naman ka partnership sa tunga sang Iloilo Science and Technology University kag Bombo Radyo.
Dako naman ang pagpasalamat ni Dr. Dennis Roy Pasadilla, manager sang Western Visayas Regional Blood Center sang Philippine Red Cross sa tanan nga organisasyon kag volunteers nga nag-upod sa Dugong Bombo agud makatipon sang dugo nga ibulig sa mga nagakinahanglan.
Suno kay Dr. Pasadilla, dalayawon ang ginpakita sang tanan nga nakigbahin sa Dugong Bombo,nagdonar man sang dugo ukon nagbulig sa ila tagsa ka pamaagi agud mangin madinalag-on ang Dugong Bombo 2019.
