𝗜𝗟𝗢𝗜𝗟𝗢 𝗖𝗜𝗧𝗬 – Safe na sa anuman nga pamahog sa bomba ang Iloilo Science and Technology University (ISAT-U) sa Burgos Street, La Paz, Iloilo City.
Ini ang kasunod man sang nabaton nga bomb threat sang unibersidad pinaagi sa netizen nga nag-comment sa ila page.
Sa interview sang Bombo Radyo kay Dr. Gabriel M. Salistre, Jr., president sang ISAT-U, iya ginpahayag nga dako nga huol ang natuga sang nasambit nga pamahog.
Suno kay Salistre sa ginpatigayon nga pagpangusisa sang mga otoridad, wala sang anuman nga bomba nga narekober sa unibersidad.
Kuntani suno sa natungdan, likawan ang paglapata sang mga patalang nga impormasyon.
Nagbulig man sa pagpatigayon sang inspeksyon sa lugar ang Philippine National Police kag Philippine Army.
Bangud sa natabo, ginpakamaayo na lang nga ikansela ang klase kaina sang aga.
Apang, ginpadayon naman ang klase subong nga hapon matapos nakumpirma nga wala man sang bomba sa unibersidad.
